ceos galegos, na biblioteca

A Biblioteca Pública Municipal do Saviñao presenta a mostra de calendarios de Ceos galegos, un proxecto de divulgación e comunicación social dirixido por X. Dosi Veiga.

A exposicón de calendarios poderá visitarse do 10 ó 31 de maio no baixo da Biblioteca Pública Municipal do Saviñao, no mesmo horario de atención ó público da biblioteca (de 10 a 13.30 e de 16.30 a 19.30), coas mesmas restricións de acceso que o resto das instalacións: máscara, distancia de seguridade e uso de xel hidroalcohólico dispoñible á entrada.

Trátase dun proxexto:

De ciencia, no sentido amplo da palabra, pois inclúe astronomía, xeoloxía, bioloxía… pero tamén historia, arqueoloxía, literatura.

De fotografía, pois artéllase ao redor dunha imaxe fermosa do ceo, ou didáctica, ou curiosa.

De cultura, porque o coñecemento científico tamén é cultura. Porque coñecer o noso contorno máis próximo permítenos comprender mellor quen somos e de onde procedemos, proxectándonos cara o futuro. Pero tamén permítenos valorar mellor os ceos doutros lugares, porque podemos aprezar as semellanzas e as diferenzas.

Para ampliar información sobre este proxecto, consulta a web Ceos Galegos ou as súas contas en Instagram, Facebook e Twitter.

certame letras galegas 2021

Como xa sabedes, cada ano convócase o Certame de Narración e Debuxo Infantil Letras Galegas para festexar o Día das Letras Galegas.

Presentámosvos xa as bases da convocatoria deste ano!

Aínda vos queda máis dun mes para entregar os vosos traballos na biblioteca de Escairón.

Animámosvos a participar tanto con historias coma con debuxos.

Bases para o certame Letras Galegas 2019

– Convocatoria Local –

A BIBLIOTECA PÚBLICA MUNICIPAL DO SAVIÑAO convoca o

CERTAME DE NARRACIÓN E DEBUXO INFANTIL LETRAS GALEGAS 2019 (Fase Local), de acordo coas seguintes bases:

1.- Poden participar todas as nenas e nenos con:

– A) Narracións, en galego, cunha extensión máxima dun folio por unha soa cara, sobre o tema:

  • “O dereito das nenas e nenos a participar na vida cultural. (Art. 37 Convención sobre os Dereitos do Neno)”

– B) Debuxos, feitos sobre cartolina de tamaño aproximado de DIN A4, sobre o tema:

  • “O dereito das nenas e nenos a participar na vida cultural. (Art. 37 Convención sobre os Dereitos do Neno)”

2.- Cada autor pode presentar cantos traballos desexe, mecanografados, escritos a computador ou a man; neste último caso sempre a bolígrafo e nunca a lapis. Con cada traballo, acompañarase unha folla co nome e demais datos do autor.

3.- Establécense tres categorías:

  • A, ata 8 anos,
  • B, de 9 a 11 anos,
  • C, de 12 a 16 anos.

4.- O prazo de presentación dos traballos rematará o vindeiro 8 de maio, debendo ser entregados polos seus autores na BIBLIOTECA PÚBLICA MUNICIPAL DO SAVIÑAO (Escairón).

5.- O xurado, formado por persoas entendidas na materia, seleccionará por cada modalidade e categoría un máximo de tres traballos.

6.- O fallo do xurado local farase público antes do DÍA DAS LETRAS GALEGAS.

7.- Os traballos premiados nesta fase local participarán na fase provincial do Certame, convocada pola Biblioteca Pública de Lugo, co patrocinio da Consellería de Cultura, Educación e Universidade da Xunta de Galicia.

8.- Os traballos premiados pasarán a ser propiedade da Biblioteca Pública, que se reserva o dereito de publicación dos mesmos.

9.- Todas as incidencias non previstas nestas bases serán resoltas polo xurado.

10.- A presentación das obras a este Certame supón a aceptación das presentes bases.

[Podes descargar aquí a ficha para os teus datos persoais]

Recordade que quen gañe na fase local participa despois na fase provincial, co cal é o dobre premios!

descrenza, na biblioteca

A Biblioteca Pública Municipal do Saviñao presenta a exposición Descrenza da Asociación Fotográfica O Potiños do Carballiño.

A mostra, composta por 22 fotografías en branco e negro, poderá visitarse do 22 de marzo ó 9 de abril no baixo da Biblioteca Pública Municipal do Saviñao, no mesmo horario de atención ó público da biblioteca (de 10 a 13.30 e de 16.30 a 19.30), coas mesmas restricións de acceso que ó resto das instalacións: máscara, distancia de seguridade e uso de xel hidroalcohólico dispoñible á entrada das instalacións.

pandemia virtual, na biblioteca

A Biblioteca Pública Municipal do Saviñao presenta a exposición Pandemia virtual do fotógrafo Ángel Utrera.

O autor pretende establecer un dialogo interior consigo mesmo dende o obxectivo da súa cámara fotográfica, “no que me recoñezo e identifico na soidade, os claro escuros, o medo e o silencio individual e individualista, no que mergullo descaradamente sen escusas, buscando deixar espido a través dunha foto esta ausencia de solidariedade e contacto físico, deste novo Virus, que resulta ser o egoísmo individualista do fascismo social provocado por esta nova normalidade absurda, irreal e fría, na que a ausencia do contacto nos está a converter en autómatas.”

A mostra, composta por 25 fotografías, poderá visitarse do 22 de febreiro ó 5 de marzo no baixo da Biblioteca Pública Municipal do Saviñao, no mesmo horario de atención ó público da biblioteca (de 10 a 13.30 e de 16.30 a 19.30), coas mesmas restricións de acceso que ó resto das instalacións: máscara, distancia de seguridade e uso de xel hidroalcohólico dispoñible á entrada das instalacións.

peche do 27 de xaneiro ó 17 de febreiro

O disposto no DOG Nº 16-Bis, do martes 26 de xaneiro de 2021, sobre medidas de prevención específicas como consecuencia da evolución da situación epidemiolóxica derivada do COVID-19 na Comunidade Autónoma de Galicia, decretou a restrición temporal da actividade das bibliotecas, polo que a Biblioteca Pública Municipal do Saviñao permanecerá pechada ó público desde o 27 de xaneiro ata o 17 de febreiro, polo que quedan pechados os servizos presenciais (préstamo e devolución, consulta e lectura en sala, uso de ordenadores).
Aínda así, continuaremos traballando a porta pechada para tervos preparadas máis novidades para cando reabramos, e continuaremos resolvendo consultas bibliográficas no teléfono 982 45 23 24 (de 10 a 14 horas) e no correo electrónico osavinao.rbgalicia@eidolocal.es.
A devolución e a reserva de documentos quedarán pospostas ata a reapertura dos centros, prevista para o día 17 de febreiro, polo que non debedes preocuparvos por que se vos sancione por non devolvelos antes desa data.
Lembrade que por ter carné da Biblioteca Pública Municipal do Saviñao podes ademais acceder de balde a GaliciaLe (plataforma de préstamo de libros, revistas, audiolibros e películas en formato electrónico da Rede de Bibliotecas de Galicia). Aí atoparedes 2 catálogos: Catálogo en galego e Catálogo en castelán. Podedes acceder a calquera deles.

Para consultar a normativa que decretou este peche temporal accede desde os seguintes enlaces:

DECRETO 8/2021, do 26 de xaneiro, polo que se adoptan medidas no territorio da Comunidade Autónoma de Galicia para facer fronte á crise sanitaria, na condición de autoridade competente delegada no marco do disposto polo Real decreto 926/2020, do 25 de outubro, polo que se declara o estado de alarma para conter a propagación de infeccións causadas polo SARS-CoV-2.

ORDE do 26 de xaneiro de 2021 pola que se establecen medidas de prevención específicas como consecuencia da evolución da situación epidemiolóxica derivada do COVID-19 na Comunidade Autónoma de Galicia.

Premiados Certame de Poesía Infantil “Nadal 2020”

Xa está exposta na biblioteca a lista de premiados no Certame de Poesía Infantil Nadal 2020

Categoría A: ata 8 anos

Deserta

Categoría B: de 9 a 11 anos

  1. Mario Francés López

Categoría C: máis de 12 anos

  1. Gael Míguez Losada
  2. Martina Francés López
  3. Patricia López López

Poderanse ver, expostas na Biblioteca, copias dos traballos premiados. Os traballos que non resultaron galardoados, poderanse recoller na mesma Biblioteca o día da entrega dos premios.

A data e forma de entrega de premios anunciaráselles ós premiados en vindeiros días.

horizontes, na biblioteca

A Biblioteca Pública Municipal do Saviñao inaugura o ano coa exposición Horizontes do fotógrafo ourensán Bruno Taboada González.

A mostra fotográfica poderá visitarse do 11 ó 29 de xaneiro no baixo da biblioteca co mesmo horario e coas mesmas restricións de acceso que ó resto das instalacións: máscara, distancia de seguridade e uso de xel hidroalcohólico dispoñible á entrada.

Trátase dunha serie de 16 fotografías a cor de distintas paisaxes do mundo, agrupadas baixo o título xenérico de Horizontes.