fotos dos contacontos

Subimos algunha foto das últimas sesións de contacontos do programa Ler conta moito que tiveron lugar na biblioteca:

Palabras confeitadas

contacontos para bebés

da man de Sherezade Bardají

o 2 de xuño, ás 17:00 na sala infantil

Comezamos apagando as luces e quedando en penumbra, sentados no chan, cos papis ó lado ou en cadeiras ó redor da sala, tan expectantes coma nós.

Desde logo, estivemos moi atentos á historia desa nena que coñecía e xogaba con personaxes tan extraordinarias coma estas

This slideshow requires JavaScript.

Algunha desas personaxes era tan mimosa que quería darnos bicos, ou que llos deramos nós. E outra fíxonos cóxegas!

Foi moi divertido. Sobre todo coas pompas de xabrón: menudo descubrimento! Foi fantástico correr tras delas para pillalas e que desapareceran!

Rematamos coa entrega de premios e unha gran ovación ós galardoados!

Un outro mundo por descubrir

Irene en Oriente Próximo

da man de Solidariedeade Internacional de Galicia

o 5 de maio, ás 17:00 na sala infantil

Para celebrar o Día das Letras Galegas (17 de maio) e en vista dos certames de debuxo e narración que tiñamos convocados, atopamos algunhas ideas sobre o mundo que queremos:

Empezamos buscando no globo terráqueo onde estamos nós e a onde se foi Irene nas súas múltiples viaxes. E detivémonos na parte máis oriental do mar Mediterráneo.

This slideshow requires JavaScript.

Vimos numerosas fotos das paisaxes, as xentes e a cultura nesa parte do mundo. Tamén escoitamos a súa música, interpretamos algún dos seus bailes tradicionais e ulimos as súas especias (algunhas non nos gustaron nada seguramente porque non estamos acostumados). Buscamos nun atlas onde está o Mar Morto e descobrimos por que se chama así e por que, se nadas nel, non afundes. Disque ata podes ler un libro se te tumbas na auga porque flotas!

Esas caixiñas que se ven no chan ocultaban parte do misterio que resolvemos ó coñecer a historia do Corvo Branco, que devolveu as estrelas, o sol e a lúa ó ceo que vemos todos os días. Tamén sabemos por que agora os corvos xa non son brancos…

Despedímonos facendo debuxando un mundo mellorado.

contacontos palabras confeitadas

O vindeiro venres día 2 de xuño, ás 5 da tarde visitaranos Sherezade Bardají co contacontos para bebés Palabras confeitadas.

Trátase dun contacontos especialmente indicado para idades de 0 a 3 anos. É un primeiro contacto coa palabra, coa oralidade, cos libros.

Farémolo a través dos sentidos, dos obxectos, das sombras. Pais, nais e bebés…. a viaxe é para todos. Poderemos atopar contos, sons, arrecendos, agarimos. Un espazo onde parar o tempo.

Ó rematar, aproximadamente ás 6 da tarde, terá lugar a entrega dos premios do Concurso Andersen Hoxe e do Certame de narración e Debuxo Infantil 2017.

O listado dos premiados é o seguinte:

Concurso “Andersen hoxe” FALLO LOCAL
Categoría Primeiros lectores (1º, 2º, 3º Primaria):
•  Óscar C M (7 anos)
•  Cayetana M S (6 anos)
•  Ignacio M S (8 anos)

Lectorado avanzado (4º, 5º, 6º Primaria):
•  Hugo C M (9 anos)

Certame de narración e debuxo infantil “LETRAS GALEGAS 2017” FALLO LOCAL
Categoría A:
DEBUXO:
1.  María V O (7 anos)
2.  Sara R L (7 anos)

visita de 5º de primaria

Os alumnos de 5º de Primaria do CPI Dr. López Suárez de Escairón na súa visita á biblioteca municipal, ademais de achegarse á biografia de Balbina López puideron ver os traballos presentados ós certames de Banda Deseñada de María Castaña e Lola de Penelas que este mes decoran a biblioteca.

Atentos á biografía de Balbina López e sobre todo a fotos da súa vida. Á esquerda vense expostos os traballos de Banda Deseñada sobre María Castaña.

Para rematar a visita, fixeron un breve percorrido pola vila de Escairón para coñecer os sitios máis relevantes de Escairón para coñecer a Balbina López: as rúas Pardo Bazán e Doctor Portela nas que viviu, a Praza maior onde tiña a súa farmacia e mercaba as froitas e verduras no mercado, e as dúas farmacias que hai hoxe na vila.

Vemos onde estaba a farmacia que rexentou Balbina López antes de que coa reforma do edificio para albergar a residencia se trasladara uns metros rúa arriba.

Aquí vemos onde os campesiños vendían os seus excedentes de produción durante a semana na praza Maior.

 

contacontos de maio

Un outro mundo por descubrir é o título da sesión de contacontos co que Solidariedade Internacional de Galicia nos invita a acompañar a Irene a Oriente Próximo o vindeiro venres 5 de maio ás 5 da tarde.

Serviranos tamén para inspirarnos para o Certame de Narración e Debuxo Letras Galegas 2017 sobre o tema O mundo que queremos.

Solidariedade Internacional de Galicia tráenos esta segunda actividade do programa “Ler conta moito” da Consellería de Cultura, Educación e Ordenación Universitaria coa colaboración do Concello do Saviñao.

Recomendamos a inscrición previa dos participantes de 3 a 5 anos para poder adaptar mellor a actividade.

día do libro coa escola infantil

Hoxe ás 11 da mañá recibimos a visita da Escola Infantil do Saviñao con motivo de que esta fin de semana se celebra o Día do Libro.

Despois de escoitar varios contos, os participantes tiveron ocasión de remexer no fondo da biblioteca os libros da sección infantil marcados con adhesivos azuis.

Como o comportamento foi exemplar, todos marcharon cun adhesivo da cor que identifica os libros adaptados á súa idade para que o lembren cando cheguen as súas familias a recollelos.

contacontos de balbina lópez

Programación Semana Santa 2017

Dentro da programación de actividades para esta Semana Santa, incluímos contacontos o martes en Escairón.

O vindeiro día 11 de abril, ás 5 da tarde teremos un contacontos especial adicado a Balbina López Somoza. Remataremos cun obradoiro de debuxo.

érase un sombreiro… con premios

Este venres o temporal non desanimou a participación no contacontos-entrega de premios-obradoiro que tivo lugar ás 5 da tarde na Biblioteca Municipal do Saviñao.
O contacontos non se interrompeu tampouco cando houbo un apagón. Grazas ás lanternas continuou coma se nada!

This slideshow requires JavaScript.

Despois do contacontos Érase un sombreiro…, recolleron os premios os galardoados do Certame de Poesía Infantil Nadal 2016 e rematamos a tarde cun obradoiro de elaboración de sombreiros no que se fixeron os sombreiros dos reinos que visitou Alicia no País das Marabillas.

Na sala infantil quedou disposta para remexer a nosa selección de libros relacionados cos sombreiros.

[Subiremos máis fotos nuns días]

contacontos con premios

O próximo venres 3 de febreiro inauguramos as sesións de contacontos deste 2017.

E comezamos forte: contacontos con entrega de premios para os galardoados do Certame de Poesía Infantil Nadal 2016.

Será ás 17:00 na Sala Infantil da Biblioteca, en Escairón.

E ó remate, aínda máis: obradoiro de elaboración de sombreiros que nos pode vir moi ben para aprender a complementar o noso traxe de entroido.

Desta vez, vai de SOMBREIROS !

… porque… quen di que os sombrerios non contan nada? Así que con  Érase un sombreiro…veremos que pasa.

Por suposto, podedes remexer na nosa selección de fondos para a ocasión, e que poderedes atopar na sala infantil e xuvenil.

Agardámosvos!

día da biblioteca-noite na biblioteca 2016

O día 24 de outubro celébrase o Día da Biblioteca.

Despois do éxito acadado nas edicións de 2014 e 2015, na biblioteca de Escairón celebraremos o Día da Biblioteca – Noite na Biblioteca o venres día 21 das 10 da mañá ás 12 da noite.

Abrimos igual que calquera outro día ás 10 da mañá pero teremos actividades todo o día sen interrupción ata a medianoite: visitas guiadas, xogos, concurso, merenda, contacontos, experimentos, titiricleta, obradoiros variados,… Un feixe de actividades para todos os gustos.

Este ano, ademais, como novidade, ó longo do día iremos enchendo unha cápsula do tempo para abrir o próximo Día da Biblioteca que coincida a venres: o 24 de outubro de 2025! Se queredes deixar algo para o recordo, traédeo á biblioteca ese día e introducirémolo dentro para non  volvelo ver ata dentro de 9 anos. O recomendable é que sexa un obxecto non demasiado grande para que caiban varios dentro da cápsula.

Xa sabedes o que vos decimos sempre: convén que vos inscribades en todas as actividades nas que queredes participar para ter materiais suficientes. Para a actividade A ciencia é divertida e o Obradoiro Fibonacci faranse 2 grupos: un de 2 a 4 anos e outro a partir dos 5 anos. Os grupos serán rotatorios para que tod@s poidan participar neles. Por eso é imprescindible que vos inscribades con antelación.

Calquera dúbida, podedes consultala na biblioteca ou chamando por teléfono.

(A actividades e horarios están suxeitos aínda a modificacións organizativas)

todos temos medos

Grandes e pequenos, homes e mulleres.

Este é o tema que trata a nosa próxima sesión de contacontos do día 5 de agosto.

Este venres, día 5, teremos contacontos ás 12 da mañá na sala infantil da biblioteca de Escairón. Será con Teresa Grau, que xa o ano pasado nos entretivo con Ubuntu.

Tés medo, ou que?

Esperámoste!