hora do conto (na corentena)

Varias bibliotecas municipais da Rede de Bibliotecas de Galicia unímonos nun proxecto a través das redes sociais para compartir coas familias cada día, de luns a venres, ó toque das 5 da tarde un conto infantil (narrado, en filme, en lingua de signos, …).

Deste xeito, cada día unha biblioteca fará a súa proposta que compartiremos todas as demais á mesma hora nas nosas redes sociais. Podedes seguir a proposta no noso Twitter @BSavinao. Tamén podedes localizalos tanto no Facebook coma no Twitter coa etiqueta: #horadoconto.

Coas etiquetas #quedanacasaele#bibliotecasmunicipais atoparedes moitas máis propostas culturais e de entretemento para estes días de encerro.

resume…música miúda

Día 2 de agosto de 2019 ás 12:00, na biblioteca de Escairón

Previo ás festas da vila, tivemos a actividade…

Música miúda

da man de Miguel Alonso e Irene

o 2 de agosto, ás 12:00 na sala infantil

tivemos esta sesión musical coa que nos achegamos ás animadas historias da vila de Bemol Pequeno, resolvendo misterios, cantando e bailando: resolvemos o misterio da música desaparecida coa Meiga Xela, cantamos co dinosaurio Pepón e don Melitón e bailamos ao ritmo que marca a Banda do Carballo.

Foi unha sesión moi divertida, non sabiamos que cantabamos tan ben!

Descobrimos instrumentos novos e sons diferentes.

Marcamos diferentes ritmos e pasámolo moi ben.

O pase de diapositivas require JavaScript.

fotos do contacontos de agosto

Día 4 de agosto de 2017 ás 12:00, na biblioteca de Escairón

Preparámonos para as festas da vila con esta actividade do catálogo Ler conta moito:

Filipa cos contos

repertorio de Carlos Casares

da man de Bandullo Azul

o 4 de agosto, ás 12:00 na sala infantil

Comezamos adaptando o oído á música de acompañamento, aprendendo unha historia do máis breve da man de Fran: Estaba a amora no seu lugar, pero como era moi moi breve, decidimos alongala un pouco con máis estrofas encadeándolle máis personaxes.

A continuación coñecemos a Filipa e puidemos escoitar unhas historias desternillantes, entre as cales había varias inspiradas na obra de Carlos Casares: Lolo anda en bicicleta, A cousa que máis doe do mundo, A figueira de Pelostortos, A galiña azul, e unha historia inventada, Hipo que?.

Cantamos, rimos, berramos, e en definitiva pasámolo en grande!

Para rematar, os que quixeron, fixeron unha foto de grupo con Filipa e Fran.

Esta actividade do programa “Ler conta moito” da Consellería de Cultura, Educación e Ordenación Universitaria coa colaboración do Concello do Saviñao, gustou moito ós asistentes, tanto grandes como pequenos.

adopta un animal de conto

CONCURSO «ADOPTA UN ANIMAL DE CONTO»

Con ocasión do DIA INTERNACIONAL DO LIBRO INFANTIL, a OEPLI e as súas seccións -Consejo General del Libro Infantil y Juvenil, Consell Català del Llibre Infantil i Juvenil (ClijCAT), Asociación Galega do Libro Infantil e Xuvenil (GÁLIX), e Galtzagorri Elkartea-, co patrocinio do Ministerio de Educación, Cultura e Deporte, convoca o concurso «Adopta un animal de conto».

[Podes descargar este Modelo para participar no concurso “Adopta un animal de conto”]
modelo.JPG

BASES PARA PARTICIPAR:

  1. Poden participar todos os lectores e lectoras que estean a cursar Primaria ou primeiro ciclo de Secundaria, a través do seu centro docente ou dende a biblioteca.
  2. Escoller un libro en galego xa lido polo/a participante, no que o animal (real ou fantástico) teña relevancia na historia.
  3. Facer un debuxo dese animal, tal e como o imaxina. Valorarase a orixinalidade, así que non se deben copiar posibles ilustracións!
  4. Xunto co debuxo deberá engadir un breve texto que explique o motivo polo cal a/o participante escolleu ese animal de conto. Cada orixinal deberá ter un formato de 10×10,15cm. Por un lado o debuxo e polo outro un breve texto, manuscrito, explicando o motivo polo cal foi escollido.
  5. En todos os traballos deberán constar os datos de identificación dos seus respectivos/as autores/as; Nome e apelidos, idade, ano de nacemento e curso escolar, así como nome do/da profesor/a ou bibliotecario/a, o enderezo, e o teléfono do centro e un correo electrónico de contacto.
  6. Deberán figurar tamén os datos do libro a partir do cal fixeron a escolla do “animal de conto” (polo menos título do libro, autor/a e editorial).
  7. Os traballos entregaranse na Biblioteca Pública Municipal do Saviñao antes do 30 de marzo ás 20:00. A biblioteca seleccionará un máximo de tres traballos por categoría e faraos chegar antes do dia 2 de abril á sección galega da OEPLI.
  8. Establécese un premio para cada unha das seguintes categorías e ámbitos lingüísticos:
    – Primeiros lectores (l °, 2° e 3°de Primaria)
    – Lectorado avanzado (4°, 5° e 6° de Primaria)
    – Superlectores (l ° e 2° de Secundaria).
  9. Cada un dos premios estará dotado cun diploma e un lote de libros para as e os premiados e a entidade (biblioteca ou centro docente) que presente os traballos.
  10. 0 xurado cualificador estará integrado por representantes de cada unha das seccións da OEPLI.
  11. O veredicto do premio terá lugar no mes de xuño e a entrega dos premios realizarase nas sedes de cada unha das sección da OEPLI.
  12. Non se devolverán os orixinais aos seus respectivos autores e autoras una vez rematado o concurso. A OEPLI poderá empregar os debuxos en diferentes soportes e usos relacionados co DÍA INTERNACIONAL DO LIBRO INFANTIL E XUVENIL, sen que iso supoña a obtención dalgún tipo de retribución para os/as concursantes e será imprescindible enviar a correspondente autorización de pais/titores para a súa reprodución e difusión na páxina web e Facebook da Organización.
  13. A simple presentación dos orixinais para o concurso supón a aceptación e conformidade coas presentes bases.

Escairón, marzo de 2016

contos infantís en calquera sitio

Hoxe xuntamos libros e novas tecnoloxías, falando dunha app para o móbil para ver vídeos de contos con distintos métodos de narración (narración oral, kamishibai, canción,…)

Pódese descargar desde a web da Fundación Germán Sánchez Ruipérez: http://decuentos.fgsr.es

DeCuentos

Selección de vídeo-relatos donde los sonidos y las voces, las manos y los objetos reinventan los cuentos de siempre y nos descubren otros nuevos para mirar, escuchar y disfrutar en las ocasiones y lugares que prefieras. Una app gratuita ideal para compartir momentos con los más pequeños, que te permite:

  • Descargar los vídeos al dispositivo.
  • Crear tu lista de cuentos favoritos
  • Compartir los que más te gusten.

Un exemplo do que se pode atopar na app, é este:

Veo, veo, un caracol?

Los tres cerditos (Os tres porquiños):

La cebra Camila:

Algúns dos títulos tamén os podes pedir na biblioteca porque os temos en libro. Consulta o noso catálogo web.

contacontos “ler conta moito”

O venres volveremos ter sesión de origami ás 12 da mañá.

O programa Ler conta moito, co que se cofinancian as actividades entre a Consellería de Cultura e os Concellos, tén operativo desde xuño un blog no que publicamos as actividades ofrecidas dentro dese programa.

A nosa última entrada nese blog é a de xuño, e ata setembro non volveremos publicar:

Contos para todos na BPM do Saviñao: Día 28 de xuño de 2013, ás 17:00, na biblioteca de Escairón

cartel_contos para todos

Manuel Solla, de Expresión Produccións, cos seus Contos para todos pertencente ó programa Ler conta moito. Despois de atopar a súa maleta máxica perdida, foi sacando dela un feixe de personaxes impresionantes, o que máis sorprendeu ó público foi o seu “Libro Máxico” da Princesa de labios de fresa do que ían xurdindo personaxes que non esperabamos e que cada vez nos sorprendían máis: unha malvada bruxa, unha ra, un dragón, e por fin un príncipe.

A súa perezosa mascota Pelusa axudoulle na súa actuación, que consistiu nun espectáculo de títeres, contacontos, maxia, animación, clown e música en directo.

Quedamos para volver xogar coas personaxes dos Contos vivos que nos traia Manuel en setembro.

Gustounos xogar e tocar a Pelusa, a mascota axudante de contacontos e experta buscadora de maletas.

Rematamos así as sesións de contacontos de último venres de mes ás 5 da tarde, pois ó longo do verán os contacontos terán lugar ás 12 do mediodía e a partir de setembro cambiarán de día.

As anteriores son:

O Duende Dada na BPM do Saviñao: Día 31 de maio de 2013, ás 17:00, na biblioteca de Escairón
A Gran Lilí Gruyére na BPM do Saviñao: Día 26 de abril de 2013, ás 17:00, na biblioteca de Escairón

proxecto “ratón de biblioteca”

Chegado o verán aumenta o número de abandonos de mascotas, e faise necesario aumentar o número de adopcións, por iso a biblioteca se apunta á adopción dun rato de biblioteca, procedente do proxecto “Ratón de biblioteca“, polo que en pouco tempo contaremos cun ratiño ou ratiña (ou serán xemelgos?) máis na nosa biblioteca.

Necesitamos axuda para escollerlle un nome. O venres, despois da sesión de contacontos das 5 da tarde, escollemos 2 nomes para a nosa nova mascota, á que lle poremos o que mellor lle acaia ou o que máis lle guste.

Estas son as propostas que eliximos (entre parénteses os votos recibidos):

  • ratiño:Anxo (1), Anselmo (4), Honorato (4), Xerardo (7), Rodolfo (11).
  • ratiña: Alexandra (5), Carola (6), Rosa (7), Lucía (8), Xaquina (9), Tareixa (11).

Tan pronto nos concedan a adopción saberemos se é Rodolfo ou Tareixa… Estamos á espera.

E para os que aínda non coñezades ós ratos que xa viven na biblioteca, estes son:

Leovixildo de Trinke é o primeiro rato que veu vivir á nosa biblioteca. Naceu en Toledo, por iso a súa familia lle escolleu o nome dun importante rei visigodo asentado en Toledo. A compañía Trinke Trinke, despois de facer unha sesión de contos de ratos, faloulle a Leo da nosa biblioteca e el decidiu vir vivir entre os nosos libros. Encántalle ler na cama, por iso seguro que sempre o viches na súa cama cun libro entre as mans (xeralmente é O pito cairo, que le cada vez que acaba de ler outro libro, e como le case un libro cada día está case sempre con el nas mans). Tamén lle gusta contar contos, se algún día te animas a preguntarlle, seguro que che conta algún dos que leu, e tamén che pode suxerir algún para que leves para a casa.

Sahaheseokio Viña (chamámoslle Sa Viña para abreviar), é curmá do rato Frederick, de Leo Lionni, do que vos falamos nun post anterior. A súa, era unha familia moi viaxeira e xa non lembran o seu lugar de orixe pois viviron en moitísimos sitios antes de chegar á Ribeira Sacra, e asentarse nunha viña, desas que polo Saviñao abundan (de aí tomaron o seu apelido). Sempre lle gustou moito ler, así que ó medrar e rematar os seus estudos, decidiu viaxar para coñecer algúns dos lugares que coñecera a través dos libros e tamén eses dos que lle falaban seus pais cando era pequena. Despois de viaxar por case todo o mundo, regresou á casa, e na súa viaxe de volta, coñeceu a nosa biblioteca. Como está cerca da súa familia, decidiu vivir aquí porque lle gustan moito os libros e pode visitar ós seus pais e irmáns con frecuencia.

Fermín González chámase así porque seus pais vivían en Pamplona cando el naceu. Como o sitio lles gustaba, decidiron poñerlle o nome do patrón de Navarra. Cando era mozo, veu de visita o seu curmán, o rato Speedy González, e como eran dous ratos moi atléticos e veloces, son dos poucos que se atreveron e correron nos sanfermíns (famosísima festa desa vila navarra). Curiosamente acabou na nosa biblioteca porque coñeceu a Savinia (que na súa viaxe polo mundo pasou por Pamplona), e ela lle falou da súa terra. Como lle pareceu un lugar fermoso, decidiu coñecelo e de casualidade atopou de novo a Savinia, que lle dixo que vivía nun lugar marabilloso, e no que había moito sitio para viviren máis ratos, sempre que axudaran a manter a biblioteca ordeada. É un gran cantante de xotas, pero só se está con amigos porque, sorprendentemente, é bastante tímido.

Sa Viña anímao a cantar, pero aínda lle falta confianza para facelo ben se está tamén presente Leo. Pouco a pouco os tres vanse facendo máis amigos. Os tres están super-emocionados con que veña un ratiño novo para a biblioteca, e están desexando ensinarlle a xogar ó parchís para xogar por equipos. Haberá que ver se á nosa nova mascota lle gusta xogar a xogos de mesa.

Incluimos unha breve selección de historias de ratos, unha para cada día da semana:

Lembrade que tedes na biblioteca máis contos de ratos.

os animais en vacacións

Chegan as vacacións, e todos os anos escoitamos falar do abandono de mascotas. Tamén do maltrato aos animais. As mascotas son unha responsabilidade que non se pode descoidar nas vacacións, e fai que ás veces sexa difícil ir de vacacións a onde se quere (porque non se admiten mascotas) ou incluso non se poida ir (porque non se atopa a ninguén que se ocupe da nosa mascota).

Presentámosvos un conto sobre un circo e que se titula “Niños al rescate” que fala sobre o maltrato aos animais.

Na biblioteca podes atopar unha amplísima lista de libros sobre animais. Pásate e pregunta onde atopalos.

[Pulsando aquí, poderás ver algúns dos títulos]

Es deses aos que non lle gustan as historias que len? Este verán presentámosce a solución:

Escribe as túas!  Seguro que che gustarán!

Tanto se che gustan as historias que les coma se non, podes empezar a escribir os teus propios relatos na biblioteca, pois durante este verán podes atopar diverso material de axuda. Despois de varios intentos, poderás comparar as túas primeiras historias coas últimas e comprobar o moito que melloraches. Podes consultar esta guía para escribilos. Tamén podes vela na biblioteca porque temos copias para que as utilices, ademais doutros materiais que che poden servir de orientación para comezar a escribir.

Conto dos vermiños Famento e Furioso

Conto dos vermiños Famento e Furioso

Narrador: Bos días, nenos. ÍImosvos contar un conto para aprender o que significa a palabra COMPARTIR.
É a historia do vermiño FAMENTO e do vermiño FURIOSO.

Famento: Ola, nenos. Son o vermiño Famento. Chámome así porque sempre teño fame, e agora mesmo estou moi triste porque non atopo nada para comer.

Narrador: O verme Famento xírase e atopa unha mazá preciosa, pero na que vive un verme.

Famento: Unha mazá! Voulle dar un bocado, ÑAM!

Furioso: Eh! Que fas?

Famento: Estaba comendo desa mazá que tén tan boa pinta.

Furioso: Esta mazá é miña e non che deixo comer! Así que vaite.

Narrador: E o Vermiño Famento marcha todo triste e con moita fame.

Famento: Está ben, xa marcho.

Narrador: E o Vermiño Famento foise moi triste porque non atopaba nada para comer, pero de pronto viu outra mazá. Esta mazá tiña unha preciosa cor verde.

Famento: Oh! Unha preciosa mazá verde! Esta vai ser toda para min! Voulle dar un bocado, ÑAM!
Puaj! Sabe fatal.

Narrador: A mazá estaba verde e sabía moi mal, así que o vermiño Famento pensou nunha solución, e lembrou a marabillosa palabra COMPARTIR, así que decidiu visitar ó vermiño Furioso.

Famento: Vermiño Furioso! Vermiño Furioso! Estás aí?

Narrador: O vermiño Furioso sae da mazá e sorpréndese de ver alí outra vez ó vermiño Famento.

Furioso: Ti outra vez! Que queres agora?

Famento: Veño facerche unha proposta. Coñeces a palabra COMPARTIR?

Furioso: Non, que significa?

Famento: Pois COMPARTIR é cando hai algo que che gusta moito, moito e lle das un pouquiño a alguén. Por exemplo, a túa mazá poderiamola comer os dous, poderiamos COM – PAR – TI – LA, e así podemos facernos moi amigos, ir a xogar xuntos, facer equilibrios polas ramas das árbores, ir navegar nunha folla pola charca,…

Furioso: Ai non! Iso non, que me da medo porque non sei.

Famento: Pois eu podo ensinarche porque a min dáseme moi ben.

Furioso: Está ben, COMPARTAMOS a mazá.

Narrador: E así é como comparten a mazá.

Famento: Que rica está!

Furioso: A verdade é que COMPARTIDA, a mazá sabe mellor.

Narrador: E dende entón, os vermiños Famento e Furioso foron moi amigos e compartiron mil aventuras pola charca, pero iso xa é outra historia.

FIN

Podedes descargar aquí unha mazá e dous vermes para colorear, recortar e representar o conto cos vosos amigos.