horario de inverno

Lembrámosvos que o venres 15 de setembro a biblioteca rematará co horario de verán e a partir do luns, a biblioteca retoma o horario de inverno, abrindo de 10 a 14 e de 16.30 a 20.

O horario da biblioteca é:

  • verán: de 08:30 a 14:30 h. (do 1 de xullo ó 15 de setembro)
  • inverno: de 10 a 14 h. e de 16.30 a 20 h. (resto do ano)

Os servizos que se prestan permanecerán dispoñibles no mesmo horario que a biblioteca, agás o servizo de préstamo e atención no mostrador que se interrompen durante as actividades.

Ídevos preparando que non queda nada para que chegue outubro… Permanecede atentos!

Ademais de libros para ler, mirar, tocar, escoitar, calquera que sexa a túa idade, de 1 a 150 anos, anímate a participar nas actividades que organizamos (podes vir acompañando ós máis pequenos da casa).

 

Advertisements

o contacontos de setembro

Día 1 de setembro de 2017 ás 12:00, na biblioteca de Escairón

Preparámonos para a volta ao cole con esta actividade do catálogo Ler conta moito:

Comechíns,

segundo prato

da man de Alba Bermúdez

o 1 de setembro, ás 12:00 na sala infantil

Mentres faciamos tempo para a hora, estivemos con Alba aprendendo cousas cun libro que non sabiamos que había na biblioteca: No tires de la cadena, secretos científicos sobre la caca y el pis nel descubrimos cousas que nunca imaxinamos que se puideran facer con esas dúas cousas.

Chegada a hora, comezamos averiguando os gustos dos participantes en canto á comida: se algún alimento non nos gusta, se temos alerxias ou intolerancias alimentarias, que é o que máis nos gusta na mesa e o que menos,…  Alba viña preparada para unha merendola de contos no campo cunha canasta cun mantel e chea de historias. Axudámoslle a poñer a mesa e a merendar contos:

Co de No quiero comer, aprendemos que coa axuda da nosa imaxinación podemos divertirnos mentres comemos aínda que sexan cousas que non nos gusten moito.

Co conto A vaca que puxo un ovo, aprendemos que poden ocorrer cousas incribles se o desexamos con forza e contamos con bos amigos.

O coelliño branco ensinounos que non hai que ser moi grande para vencer a un mangallón: abonda con ser máis listo porque o medo non debe deternos. 

C’O segredo de Flora, aprendemos unha canción para alonxar o mal humor e os comportamentos violentos.

E con Imos cazar un oso fomos de aventura con toda a familia.

Coma sempre, unha pequena selección de libros relacionados está exposta na Casiña dos ratos:

fotos do contacontos de agosto

Día 4 de agosto de 2017 ás 12:00, na biblioteca de Escairón

Preparámonos para as festas da vila con esta actividade do catálogo Ler conta moito:

Filipa cos contos

repertorio de Carlos Casares

da man de Bandullo Azul

o 4 de agosto, ás 12:00 na sala infantil

Comezamos adaptando o oído á música de acompañamento, aprendendo unha historia do máis breve da man de Fran: Estaba a amora no seu lugar, pero como era moi moi breve, decidimos alongala un pouco con máis estrofas encadeándolle máis personaxes.

A continuación coñecemos a Filipa e puidemos escoitar unhas historias desternillantes, entre as cales había varias inspiradas na obra de Carlos Casares: Lolo anda en bicicleta, A cousa que máis doe do mundo, A figueira de Pelostortos, A galiña azul, e unha historia inventada, Hipo que?.

Cantamos, rimos, berramos, e en definitiva pasámolo en grande!

Para rematar, os que quixeron, fixeron unha foto de grupo con Filipa e Fran.

Esta actividade do programa “Ler conta moito” da Consellería de Cultura, Educación e Ordenación Universitaria coa colaboración do Concello do Saviñao, gustou moito ós asistentes, tanto grandes como pequenos.

obradoiro de debuxo monstruoso

O venres 7 de xullo, debuxa en directo co autor dos Megatoxos.

cartaz_anxo_farina_pq

Podes aproveitar para coñecer as obras que temos na biblioteca. Así cando veña, poderás facerlle preguntas sobre os seus traballos. Están xa expostas na casiña dos ratos. Podes atopar desde contos infantís e novelas xuvenís ata guías de viaxes por Galicia e as ilustracións dun libro de teatro.

Ensinaranos trucos para debuxar e rematarremos coa contrución dun deseñador de monstros ou seres imaxinarios.

Vente divertir mentras aprendes!

Teremos 2 obradoiros o  venres 7 de xullo:

  • ás 12 da mañá na Biblioteca de Escairón
  • ás 5 da tarde na Biblioteca de Currelos

Deberás anotarte porque hai aforo limitado e para que teñamos materiais suficientes para todos. Podes facelo no teléfono da biblioteca: 982452324 durante as horas de apertura (10-14 h. e 16:30-20 h. e a partir do 3 de xullo de 8:30-14:30 h.).

diario de ana frank

Acaban de facerse 70 anos da primeira publicación do Diario de Ana Frank da man do seu pai Otto co título de A casa de atrás (o 25 de xuño de 1947).

Trátase da historia dunha moza alemá de ascendencia xudea que se traslada coa súa familia fuxindo da Alemania nazi a refuxiarse en Ámsterdam.

diarioÓ facer os 13 anos Ana recibe como agasallo dos seus pais un libro de autógrafos que comeza a usar como diario.

Pouco despois, toda a familia terá que ocultarse coa chegada dos nazis.

Escribe no diario tamén durante os 2 anos e 1 mes en que permaneceu oculta coa súa familia e outras 4 persoas ata que foron descubertos (entre o 9 de xullo de 1942 e o 4 de agosto de 1944).

diario2Só un ano despois de ser capturadas, Ana e a súa irmá maior Margot, morreron de tifus pouco antes de que o campo de concentración nazi de Bergen-Belsen ó que foron trasladadas fora liberado.

O seu pai, Otto Frank, foi o único sobrevivinte do grupo de persoas que se escondían xuntos en Ámsterdam. Ó recuperar os escritos de Ana, decidiu cumprir o desexo da súa filla e publicou a súa historia, que foi traducida a varios idiomas.

Podes atopalo na biblioteca!

chegan as vacacións

Xa queda pouco. Chegan as vacacións.

Pero na biblioteca seguimos ofrecéndoche entretemento!

verán-pq

Podes consultar a nosa sección de novas incorporacións nos estantes de novidades, ou a sección de novas incorporacións do noso catálogo web. No “desglose por seccións” podes consultar os fondos por grupos de idade, idiomas e tipo de material.

Podes seguir vindo conectarte a internet, ler nas salas, buscar o fresco no balcón, visitar sen fatigas a Ribeira Sacra a través da biblioteca, participar nas nosas actividades…

Aconsellámosche que sigas practicando os idiomas no verán, e para iso recomendámosche que aproveites os nosos libros noutras linguas:

Tampouco te preocupes se che costa ler noutro idioma, que non precisas dicionario cos nosos libros bilingües.

Bucea polos nosos estantes e atopa desde manualidades ata chistes, refráns e receitas de cociña, novelas e teatro, contos e fábulas, historia e matemáticas. As posibilidades son moi variadas!

carlos casares día das letras galegas 2017

libro carlos casaresEste ano o Día das Letras Galegas adícaselle a Carlos Casares, quen naceu no ano 1941 en Ourense. Estudiou Filosofía e Letras en Santiago de Compostela. Exerceu a docencia desde 1969, en Viana do Bolo, Bilbao, Cangas do Morrazo e Vigo, onde faleceu o 9 de marzo de 2002.

This slideshow requires JavaScript.

Entre as súas obras máis coñecidas entre as dispoñibles na biblioteca destacamos:

Todos os libros de Carlos Casares dispoñibles na biblioteca pódelos consultar neste enlace e ver na mostra bibliográfica coa que acompañamos a exposición sobre Carlos Casares que se pode ver na biblioteca.

Na Biblioteca Virtual Galega pódese ademais de ler a súa biografía, consultar a súa bibliografía e mesmo ler algún fragmento da súa obra.

Na web da Real Academia Galega podedes atopar tamén información sobre a súa vida e obra.

No portal Día das Letras Galegas pódese consultar a lista dos homenaxeados.

contacontos de maio

contacontos maio un outro mundo.png

Un outro mundo por descubrir é o título da sesión de contacontos co que Solidariedade Internacional de Galicia nos invita a acompañar a Irene a Oriente Próximo o vindeiro venres 5 de maio ás 5 da tarde.

Serviranos tamén para inspirarnos para o Certame de Narración e Debuxo Letras Galegas 2017 sobre o tema O mundo que queremos.

Solidariedade Internacional de Galicia tráenos esta segunda actividade do programa “Ler conta moito” da Consellería de Cultura, Educación e Ordenación Universitaria coa colaboración do Concello do Saviñao.

Recomendamos a inscrición previa dos participantes de 3 a 5 anos para poder adaptar mellor a actividade.

lola de penelas

Esta mañá presentouse na Casa da Cultura de Monforte o libro Lola de Penelas, unha muller para o 8 de marzo que se acaba de editar.

E desde esta mesma tarde está dispoñible no fondo da biblioteca municipal!

O conto está elaborado polo Centro de Información á Muller coa colaboración do Colectivo Lemos Le (integrado por bibliotecas escolares e municipais da Comarca de Lemos e a Asociación de Libreiros de Monforte) e está ilustrado cos traballos dos escolares dos concellos da Comarca de Lemos.

libros-lola-de-penelas.jpg

Esta mañá recollemos os exemplares da biblioteca e esta tarde xa pode levarse para a casa xunto con Inés de Castro, unha muller para o 8 de marzoMaría castaña, unha muller para o 8 de marzo das anteriores edicións.

portada Inés de Castro, unha muller para o 8 de marzo

Inés de Castro, unha muller para o 8 de marzo

12929-1

María Castaña, unha muller para o 8 de marzo