día da biblioteca-noite na biblioteca 2017 (resume)

Día 20 de outubro de 2017 das 10 da mañá ata a medianoite, na biblioteca de Escairón

O día 24 celébrase o Día da Biblioteca, e na biblioteca, debido ó éxito acadado en anteriores edicións (esta é a cuarta), decidimos adiantar a celebración ó venres e non pechar en todo o día. Así tivemos actividades de moi diverso contido, empezando con visitas escolares ó longo de toda a mañá e non rematando ata a medianoite.

Ás 10:00 chegou o primeiro dos grupos escolares (4º, 5º e 6º de Infantil do colexio de Escairón) e ás 11:15 chegou o grupo da Escola Infantil Municipal,  que viñeron coñecer a biblioteca e que se entretiveron e divertiron cos contos prohibidos Hola, cartero, Pezzettino ou Soy el más guapo.

Ás 12:00 chegaron os alumnos de 1º, 2º e 3º de Primaria e ás 12:45 os de 4º, 5º e 6º de Primaria, que despois de repasar o aprendido sobre O Saviñao na visita do ano pasado (fixemos exame e non se libraron tampouco os profes, que xa están avisados para a próxima), continuaron vendo como é que un libro pasa a formar parte do fondo da biblioteca e se pón a disposición do público: como lle poñemos o identificador de código de barras para facer o empréstito no novo Sistema de Xestión Bibliotecaria. Por grupos, identificamos e etiquetamos varios libros da sección xuvenil, que xa están colocados onde lles corresponde. Ademais aproveitamos para recordar que había máis actividades pola tarde.

De 14:00 a 17:00 reservamos tempo para as visitas guiadas á biblioteca.

Ás 17:00 a nosa primeira sesión “oficial” de Contos Prohibidos da tarde, na que cada quen mirou e remirou os títulos que temos dispoñibles.

Ás 18:30 (despois da merenda) coñecemos A superavoa de Antón da Organización Meu Rei (que colabora coa Fundación Meniños de Galicia)(a partir de 3 anos e público familiar), que rematamos cun obradoiro artístico. Un breve resumo é este:

Día da Biblioteca 2017b

Toda a tarde estivo chea de contos, moitos deles que foron prohibidos. No obradoiro d’A superavoa de Antón, creamos unha chea de personaxes en pedra entre a hora da merenda e a da cea!

Ás 19:30 a segunda sesión sesión “oficial” de Contos Prohibidos durante a que vimos novamente Hola, cartero, Orellas de bolboreta, e outros varios que representamos por grupos: Pezzettino (en italiano), Mi perrito quiere bailar ballet, ou Soy el más guapo.

Ás 20:30 Xogos por equipos e unha apetitosa cea para que a fame non acabara coas ganas de diversión.

Ás 22:00 vimos que As cousas pequenas contan (do repertorio do programa Ler conta moito). Con el soubemos que calquera obxecto nos pode servir para crear personaxes e inventar historias. Coas historias inventadas durante o obradoiro fixemos un precioso conto!

A partir das 23:00 relaxámonos con música e baile, e non faltou o karaoke!

Día da Biblioteca 2017c.jpg

As cousas pequenas contan leváronnos a inventar personaxes e historias, coas que se fixo un libriño que podedes atopar na biblioteca. Rematamos con baile e karaoke.

A medianoite despedímonos con poucas ganas de marchar para a casa.

Esperamos que o pasarades moi ben e que sigades con ganas de visitar a vosa biblio. Nós xa estamos pensando a ver como o celebramos o ano que vén.

Agradecemos de corazón a participación nas actividades e alegrámonos de que o pasarades tan ben que non quixerades marchar para a casa.

Podedes ver o que publicamos tamén no bog Ler conta moito sobre as actividades do Día da Biblioteca.

Iremos publicando máis fotos (visitas escolares, obradoiros, …)

día da biblioteca-noite na biblioteca 2016

cartel-2-baja_pq

O día 24 de outubro celébrase o Día da Biblioteca.

Despois do éxito acadado nas edicións de 2014 e 2015, na biblioteca de Escairón celebraremos o Día da Biblioteca – Noite na Biblioteca o venres día 21 das 10 da mañá ás 12 da noite.

Abrimos igual que calquera outro día ás 10 da mañá pero teremos actividades todo o día sen interrupción ata a medianoite: visitas guiadas, xogos, concurso, merenda, contacontos, experimentos, titiricleta, obradoiros variados,… Un feixe de actividades para todos os gustos.

Este ano, ademais, como novidade, ó longo do día iremos enchendo unha cápsula do tempo para abrir o próximo Día da Biblioteca que coincida a venres: o 24 de outubro de 2025! Se queredes deixar algo para o recordo, traédeo á biblioteca ese día e introducirémolo dentro para non  volvelo ver ata dentro de 9 anos. O recomendable é que sexa un obxecto non demasiado grande para que caiban varios dentro da cápsula.

cartaz-final3.PNG

Xa sabedes o que vos decimos sempre: convén que vos inscribades en todas as actividades nas que queredes participar para ter materiais suficientes. Para a actividade A ciencia é divertida e o Obradoiro Fibonacci faranse 2 grupos: un de 2 a 4 anos e outro a partir dos 5 anos. Os grupos serán rotatorios para que tod@s poidan participar neles. Por eso é imprescindible que vos inscribades con antelación.

Calquera dúbida, podedes consultala na biblioteca ou chamando por teléfono.

(A actividades e horarios están suxeitos aínda a modificacións organizativas)

volve origami pola tarde

Volvemos comezar cos obradoiros de origami as tardes de venres.

origami-veranXa sabedes que a actividade se adapta ó nivel dos participantes polo que non son precisos coñecementos previos. Ademais está aberta tanto a pequenos coma a grandes, non hai limitación de idade máis que a que impón o saber dobrar o papel seguindo as instrucións.

Coma sempre, agardamos por vós os venres ás 5 da tarde na sala infantil.

En vindeiras semanas iremos avanzándovos as nosas actividades de outono.

obradoiro de mar

Como a exposición de bolboretas remata o día 17, este venres, ademais do obradoiro “acuático”, faremos unha actividade relacionada coas bolboretas para despedir ás Monarcas que lle deron color e calor á biblioteca no que vai de mes.

Se non a vistes, aproveitade que xa queda pouco: podedes ler ademais dos paneis, os dossieres e ver o documental que proxectamos luns, martes, xoves e venres na aula ás 13:00 e ás 18:30, ademais de proxeccións baixo demanda.

Ás 17:00 h. teremos o obradoiro de origami e ás 18:30 os obradoiros mariño e de bolboretas.

Xa veredes que marabilla faremos cos botellas de plástico: unha especie de acuario auténtico (e non podo dicir máis para que sexa sorpresa).

día da biblioteca-noite na biblioteca 2015

Día 23 de outubro de 2015 das 10 da mañá á 12 e media da noite, na biblioteca de Escairón

O día 24 de outubro celébrase o Día da Biblioteca. Despois do exito acadado na edición de 2014, decidimos celebrar o Día da Biblioteca cunha noite na biblioteca, festa que adiantamos ó venres porque os sábados non abrimos.

Abrimos igual que calquera outro día ás 10 da mañá, e, collendo aire, preparámonos para aguantar ata a ben pasada a medianoite. Este ano ampliamos aínda máis o repertorio de actividades, empezando coas visitas escolares durante toda a mañá.

Ás 10:15 chegou o primeiro dos 3 grupos de alumnos de infantil e primaria do colexio de Escairón que viñeron coñecer mellor a biblioteca como espello ou retrato do que é o noso concello. Este ano visitaron a biblioteca todos os aumnos de infantil e de primaria (máis de 110 alumnos e 9 profesores e profesoras), e aproveitamos para explicarlles os pasos que segue un libro antes de formar parte do noso fondo cunha práctica de rexistro dun libro (que xa están na selección de novidades do catálogo da biblioteca, e nuns días terán un artigo propio no noso blog. Ademais aproveitamos para invitalos a participar nas actividades da tarde.

visitas escolares

Distintos momentos das visitas escolares á biblioteca

Tantas foron as ganas, que xa ó saír do cole, algúns quixeron vir para biblioteca aproveitando que non estaba pechada á hora do xantar.

actividades de Xapón

Actividades de Xapón: uso do soroban e origami

Ás 17:00 seguiron as actividades con Xapón e origami, obradoiro de cociña ás 18:00 e merenda.

obradoiro de cociña

O resultado do obradoiro de cociña, que degustamos durante a merenda

merenda

Durante a merenda demos boa conta dos pratos elaborados no oobradoiro de cociña

Ás 19:00 antes da sesión de Contos do mundo, unha viaxe polo mundo a través dos contos a América Central da man de Solidariedade Internacional de Galicia ás 20:00 (do programa Ler conta moito). Durante esta sesión acabamos descubrindo que o animal máis perigoso de América central nada tan grande coma un felino ou unha serpe, senon un animaliño minúsculo: un mosquito! Sorprendémonos con alguna das historias desa zona do planeta que localizamos nun globo terráqueo.

Contos do mundo

Escoitamos atentamente os Contos do mundo, para facer unha viaxe polo mundo a través dos contos a América Central da man de Solidariedade Internacional de Galicia

Ás 21:00 logo dun pequeño tapeo para que a fame non acabara coas ganas de festa, aproveitamos a enerxía recén acumulada para unha sesión de xogos e obradoiros: xogamos ás cadeiras colaborativas (a solicitude popular por aclamación e porque o ano pasado gustaron tanto, tanto que quixeron repetir), construír un pequeno conto pop-up d’Os tres porquiños e o lobo, xogar cunha lámpada de plasma e un pequeño truco/experimento científico.

xogo das cadeiras colaborativas

Non houbo maneira de convencer ó público de que este ano non ía haber xogo das cadeiras colaborativas, que tanto gustou o ano pasado que houbo que repetilo por petición popular

conto popup

Elaboramos un conto de tipo pop-up da historia Os tres porquiños

Vimos e xogamos cunha lámpara de plasma. Gustounos vela na escuridade (había que aproveitar que era de noite) e ver como saltaban os raios no seu interior

Vimos e xogamos cunha lámpara de plasma. Gustounos vela na escuridade (había que aproveitar que era de noite) e ver como saltaban os raios no seu interior

Ás 22:00 descansamos de exercicio coa sesión amenizada  por Eduvía, Imos xogar con Filgueira Valverde (do programa Ler conta moito), un  xogo con preguntas e probas, para o que se sortearon os  equipos contando cada un cunha madriña adulta (porque non se presentaron padriños). Moitas risas e diversión, desde logo. E claro, o reparto do premio foi moi ben acollido porque os e as participantes eran amantes das lambonadas.

Imos xogar con Filgeira Valverde

Con Eduvía, xogamos con Filgueira Valverde e aprendemos moito sobre este autor, rimos un montón e pasámolo moi ben

Ás 23:30 (máis tarde do previsto porque o xogo estaba moi entretido e o tempo pasou voando) continuamos cun obradoiro de manualidade científica e cun obradoiro poético guiado pola escritora Rhodea Blasón ás 00:00.

obradoiro con Rhodea Blasón

Con Rhodea Blasón traballamos a arte poética escribindo varios anagramas coas letras E S C A I R O N. Os resultados, preciosos.

filtros

Fixemos un experimento científico para ver como se descompoñen as cores

En resumo, un exitazo. E, igual que pasou o ano pasado, rematamos máis tarde do previsto porque ninguén quería marchar. Ata houbo quen propuxo quedar a durmir na biblioteca, pero como esqueceran traer saco de durmir, tiveron que ir durmir á casa.

Xa veremos que pasa o ano que vén.

Agradecemos de corazón a participación nas actividades e o magnífico comportamento demostrado durante TODO o día.

Podedes ver o que publicamos tamén no bog Ler conta moito sobre as actividades do Día da Biblioteca.

o prometido é débeda: instruccións de origami

Como o prometido é débeda, subimos aquí os pasos de elaboración da figura máis sinxela. A partir dela elabóranse variantes, que deberedes vir aprender ás sesións de origami. Podédelas ver na exposición cambiante (tamén no noso Facebook).

PASOS PARA CONSTUÍR FIGURAS DE LADOS CADRADOS OU TRIANGULARES

Podemos ver as imaxes para seguir o paso a paso [para ampliar as imaxes pulsa nelas].

1 e 2: doblar diagonais facendo triángulos e abrir.

3: levar esquinas superior e inferior ata a liña central e facer 1 MARCA.

4: dobrar esquinas superior e inferior ata a MARCA.

5: dobrar lados superior e inferior ata a liña central.

6: dobrar lados esquerdo e dereito formando un rectángulo cos lados do plegado anterior.

7: dobrar a ESQUINA INFERIOR cara ARRIBA xuntando o BORDE INFERIOR coa LIÑA CENTRAL e desdobrar. Dobrar a ESQUINA SUPERIOR cara ABAIXO xuntando o BORDE INFERIOR coa LIÑA CENTRAL e desdobrar.

8: levantar a solapa superior e esconder a esquina inferior dereita. Levantar a solapa inferior e esconder a esquina superior esquerda.

9: volteamos e dobramos os lados máis longos ó medio (ver liñas verdes).

MONTAXE: os vértices que saen (frechas saíntes) encaixan dentro dos bolsillos (frechas entrantes).

A montaxe é cuestión de práctica, e cantas máis pezas fagamos, máis figuras distintas podemos facer. A máis básica leva 3 pezas.

origami de verán

Lembrade que os

venres ás 12:00
temos
sesión de origami

Onde? Coma sempre, na biblioteca.

As sesións serán para adultos e para máis pequenos. Traballarase en grupos en función das distintas habilidades. adaptándose as figuras a realizar ás capacidades dos participantes: figuras de iniciación para practicar, e co avance das sesións, figuras algo máis complexas.

Animádevos a participar nalgunha das sesións porque en cada sesión comezaremos vendo os tipos de pregues máis básicos e despois combinarémolos aplicándoos a unha ou dúas figuras por sesión.

exposición “Sin perder contra la lluvia”

Como xa sabedes, a o proxecto da biblioteca relacionado co Xapón foi recoñecido como oficial polo Comité Ejecutivo Japonés del Año Dual España-Japón en outubro.

Despois das xornadas que nos tiveron viaxando polos concellos limítrofes a finais do mes pasado, este mes contamos coa exposición Sin perder contra la lluvia, só ata o día 27.

A exposición, organizada pola Asociación Hispano Japonesa de Turismo en colaboración coa embaixada de Xapón en España, mostra o espíritu loitador por saír adiante da cultura xaponesa.

En moitas fotos apréciase a destrucción total causada, pero sempre hai unha nota positiva.

Unha mostra de como o pobo xaponés se sobrepón á adversidade con optimismo.

Son fotografías das tarefas de reconstrucción que seguiron á devastación que provocaron o terremoto do 11 de marzo de 2011, o tsunami que o seguiu e o posterior desastre da central de Fukushima.

Unha mostra do agradecemento e do optimismo polo futuro.

Merece a pena visitala: a maioría da xente di que lle supón unha sorpresa, que as fotografías non son o que esperaría.